"EL CONFRONT DEI COLMEI"Domenega 29 april ’n piaza Marzari se trova en po’ de zent dei colmei per nar a somenar l’orzo. Parte el car del Gigioti ”oliver”, cargà de mateloti e drio na sdragola de zent en costume da ’sti ani e anca en po’ de curiosi.
La destinazion l’è el campo dei Boscati: arivadi sul posto i omeni i taca el caval al piovo e i fa en par de arade, per dimostrazion (el campo l’era za sta arà).
Pò se spartis el campo en quatro tochi precisi, uno per colmel; en mèz a ogni quadro se mete ’l stemma del colmel. Finalmente se scominzia a somenar, prima el prà e pò l’orzo: l’è propri bel veder ’sti omeni e ’ste done cola gaida piena de orzo che i spande la somenza per el campo. Fora e dentro, en qua en là zercando de nar gualivi. Ruà de somenar, tacà l’erpec al caval i ha erpegà tut el campo zercando de sotrar ben la somenza. Qualchedun ala fin ha ’n piantà anca spaventa passeri, sperando che i osei no i becasa su tut l’orzo. Purtropo quel che no ha magnà i osei ha brusà la suta e de orzo n’è vegnù su propri poc. Così el 29 de luio, ’nvezi che a zerlar sen nadi a spigolar, propri come i feva sti ani quando ghe capitava ’na suta. Done omini, mateloti de ogni colmel tuti ’ndafaradi a binar ensema quele poche spighe che era cresù, far i mazoti e meterli ’n del zerlo. Pò l’aven pesade e i pù bravi (o fortunadi?) l’è sta quei de sovic. Dala Madona de agost ’n piaza aven brustolà l’orzo propri come i feva sti ani, col brustolin e ’l profumo che se spandeva dapertut. Le done le aveva argià anca la menestra de orzo: la giuria l’ha stabilì che la pù bona l’era quela dei Masi. Pò aven dat fora na scudeleta de menestra a tuti, così che anca i furesti i sentisa che bona che l’è sta pietanza de na volta. En tant che se tastava, i mateloti i ha zugà ai quatro cantoni e così anca per quest’an è finì ”El confront dei colmei”. |